روتانا (مش هتقدر تغمض عينيك)
(التدخين ضار جدا بالصحه)على علبة السجاير.(احذر من الشطه)على علبة الكشري .(مش هتقدر تغمض عينيك)على روتانا.انا باحترم جدا كل الاماكن دي(مصنع السجاير-محل الكشري - قناة روتانا)باحترم الجزار الي بيقول للدبيحه معلش مضطر ادبحك اصل اكل العيش مر.
روتانا هي القناه الوحيده اللي صرحت بكل جراءه وقالت للمشاهد انه هيصاب بحاله من البله و التخلف طول ما هو بيتفرج عليها و وريتنا شكل المصابين وكله تمام أدينا عرفنا مستقبلنا.
م.م.م.م.م.م. كل ده مش هو المهم .المهم كان سؤال على بالي من مده يخص مجلة روتانا والي هرش كتابها رأسهم و تساءلوا (هل العرب فاشلون جنسيا؟)قبل ما نفكر في اجابه تعالو نتفق ان الناشر والقارئ عرب .و نفكر لو كانت الاجابه لا العرب تمام و كويسين يبقى المقال ملوش لزمه من اساسه يعني كأني سألت واحد انت طلعت من بطن مامتك زينا أكيد هيقول زي الناس .لكن التساؤل المفروض يكون في شيء منافي للطبيعه البشريه.
طيب لو الاجابه( ايوه العرب فاشلون جنسيا)مين المستفيد من بين الناشرين العرب والقراء العرب برده من فضيحه زي دي ؟
طبعا مش هاتكلم عن مدى صحة الكلام ده .....اكيد الناشرين صح و على راسهم بطحه.واكبر دليل على فشل العرب تواجد جمعيات تحديد النسل في اغلب الدول العربيه(انا قلت جمعيات تحديد النسل مش جمعيات الحفاظ على النوع والسلاله)
انا عايز اقول لو كان لك واحد صاحبك كل ما يشوفك يقولك ان مراتك وحشه أكيد هاييجي يوم تكره مراتك (و بالمثل لو كل ما تشوفي التلفزيون بيقولوا فيه ان العرب كلهم طلعو زي حاحا مبيعرفش !!! اكيد هتتغير نظرتك لحاحا؟!؟!؟!اقصد لجوزك حتى لو كان عتريس او عنتر هاتشوفيه توتو -حاحا - مشمش-كده يعني.
كده ممكن نلخص كل ده كالآتي:
روتانا (وغيرها)تقدر تملى لك كل وقت فراغك وتتضيعلك شغلك كمان ما انتا مش هاتقدر تغمض عنيك مع بعض الاعراض الجانبيه زي البرود الجنسي -الفشل في العلاقات الزوجيه - شلل في جفون العين . ومراتك ان شاء الله هتروح من الصبح اما للمحكمه(هتتخلع يا عسل)او لدكتور التجميل تظبط نفسها بكام الف .
.........................................................................................................................
والسؤال ده بردو تاعبني اوي :هو فين الكتاب ؟(آسف لاستخدام مصطلحات غريبه الكتاب ده مجموعه من الاوراق لما تقراه ممكن تستفيد او لا.. بس أكيد مش هتمل ولا هتموت) فين دوره الرائد لبناء المجتمع بدل ما الناس رائده أدام التلفزيون زي البطه البلدي فوق البيض. نفسي اعرف هما مستنيين ايه يمكن مستنيين الفلوس او الشغل ييجي تحت رجليهم (آآآسف قصدي تحت ....... لما البيض يفقس)
وبالمناسبه ده مش معناه ان انا مابتفرجش على التلفزيون ....بالعكس انا زي كل الناس ممكن اندمج مع الأحداث وأتأثر بمغامرات بطل الروايه و أحزن لموت واحد مش من عيلتي ولا حتى له وجود في الواقع و في النهايه انام و انا متاثر بأحداث كنت في غنى عنها ملهي تماما عن واقع حياتي وغافل عن احداث أكتر أهميه و هي أكتر أهميه فقط لأنها من عالم الواقع حتى لو كانت الأحداث دي موت قطة الجران ده واقع لازم نتعامل معاه .
(الفاتحه على أمواتنا وكمان أحياءنا الي في وزن الانسانيه اموات و بالمره على قطة الجيران)
(روتانا وهل يخفى الخطر)